Koameka nhoakattoawa Inialirhe khedzatsa.

Mendzamitsa nodia nookawa inialhitte, wamotto ayaha Hipanakhitte wadeepe madzakani kamoi, kadzo whata peema pakapi nhette phewi peemana khitte. Waakawa deepiphena Ttonowirhe.

Wakakadzami, waatha waama lhie aynheekada linako lhia wamaawape wemaa neeni. Waakawa maittakairiko, rodzanakhapani waiñhawa rhoa apama iakada wainai. Wemaakhapani doromeema.

Pidzoomeni, waa wapita Inialirikolhe. Liphontte waa waira nainai mingau nhaa dzakaleerikoperi. Kadzokadantsa iidzeekani panhiwa. Liphonttena kaako whaa naapidza nhaa Yanheekape linako paakadzeekatakakaroda, wattaitakaro whetaka nhaa pheewakaroda.

Wamatsiata nhikadzamina phiome wakeñoena lhia waali wadeenhi. Ikametsa noada iyokakawa kadzota 44da idanaakakape lirikoda lhia waali wadzeekata. Wakeñoa 9 horas, haamawha 13:30 horas.

Wadiattoa waiñha nheette liphontte waa wapita.  Lhipakeena 15:00 waatsenakha wawadzaka lhia phepada wadeenhikale. Lhia wadeenhiri wattathaka whemawa nakoamista nhaa yomakape ikadzeekatakakawa. Pada irhio wakadaa kadzoata 5 minutos. Nheette nhoa nhota lhia nhemani nheette nakapakanaa. Wattaita, 8 horas deepi.

Nheette nhoa, noatopekeetseeka noemanhi naikhalhe nhaa padapena noanhenipe. Noatopekatsa noiñha nainai nhaa paana. Doromeena nodiakhapani nomaa.

Pidzoomeni noa nopita. Liphontte, noa nokadaa notshakoni watanirikolhe pawaliniritsa. Metsa, doromeena, heekoapikeenani wamareenawa, ima matshi kathoa lhia wanhikarona. Wapatonhiphattoawa pakoapenaliko. Waakawa Hipanakolhe, dzaliimepinako.

Ikametsa, wawadzakaka lhia wadeenhikale.

Raimundo

Anúncios

Deixe um comentário

Preencha os seus dados abaixo ou clique em um ícone para log in:

Logotipo do WordPress.com

Você está comentando utilizando sua conta WordPress.com. Sair / Alterar )

Imagem do Twitter

Você está comentando utilizando sua conta Twitter. Sair / Alterar )

Foto do Facebook

Você está comentando utilizando sua conta Facebook. Sair / Alterar )

Foto do Google+

Você está comentando utilizando sua conta Google+. Sair / Alterar )

Conectando a %s